華懋搬新屋後，地方明顯闊落過以前尖東個辦公室，但相信最重要係忘記過去尖東華懋留下嘅不快事，重新上路。龔仁心同一班華懋老臣子、員工都為集團喬遷感到高興，他同大家打成一片，仲猛叫員工：「食多啲啦！燒肉靚呀！」開幕儀式過後，龔仁心拜託家姐龔如心生前秘書區燕玲派發大利是、金桔、花生及朱古力予各部門員工，祝大家工作順利。

搬遷集團有何展望？龔仁心話：「搬新Office後希望有一番新景象，再創佳績，但點講都冇用，你哋留心睇吓成績點啦！」其實尖東華懋總部辦公室早在聖誕節前已開始將文件封箱及打包，而區燕玲與多名同事則先到新總部打點，直至本周一才正式運送到如心廣場。龔仁心尋日講到搬屋時話：「我都冇乜特別嘢搬，都係搬啲私人嘢啫！」