經濟動力嘅立法會議員「蘇菲」梁劉柔芬月中飲完新抱茶後，工作依然忙個不停，上星期六喺東亞運動會香港足球隊祝捷酒會出現後，尋日又見佢同幾個盟友去政府總部見財爺，會後又急急腳鬆人，趕去參加志蓮淨苑水陸法會。忙咗咁耐，蘇菲終於可以鬆番吓，今日會同家人起程到新加坡旅遊過新年，仲話會大歎地道嘅肉骨茶添。
蘇菲話，其實唔單止佢工作忙，佢老公、身兼香港足球總會主席嘅梁孔德一樣咁忙，為籌備港足參加東亞運奔波咁耐，好應該去旅行休息吓。至於會遊覽獅城乜嘢旅遊景點，佢話三個仔女已安排好行程，佢只係跟大隊去玩喎！咪睇暢遊獅城冇乜特別，對蘇菲嚟講可謂意義重大，事關細新抱阿May入門後首次同佢去旅行，旅行有新抱照顧，甜到入心啦！