好似學hea不成金管局前總裁任志剛，聖誕前喺北京宣布幫中國金融學會做執行副會長，佢冇留喺北京過個白色聖誕。尋日見佢一條「冷」雙手插袋喺中環出現，着住黑色西裝嘅佢，襯埋彩色頸巾，加埋個招牌髮型，真係瀟灑中帶幾分調皮，隱約透出一絲hea嘅神態。問佢嚟緊新年有乜嘢新願望，佢仲鬼鬼馬馬咁話︰「願望係我自己嘅，唔講得畀人聽。」

冇耐，又見到攞住一疊文件行過嘅前財爺阿松梁錦松。唔知係咪因為國際金融危機仲未過去，所以搞基金投資嘅阿松都唔敢鬆懈，佢話聖誕節除咗陪家人參加崇拜之外，直到新年都依然冇得放假去玩，即係話想hea都難。