政改方案反彈咁大，佢直言最關鍵可能係煲呔曾一句「玩鋪勁」。佢話政改係嚴肅嘅事，豈能亂「玩」？再者個「勁」字畀社會好大期望，但希望愈大失望愈大，區議會方案更令委任區議員喺立法會選舉中失去被選權同投票權，仲揚言如果委任區議員冇投票權，下次再委任佢做都唔制嘞。

提到香港隊喺東亞運破天荒奪金，大輝覺得一切榮譽、掌聲同歡呼唔應該只落喺一場球賽上，咁樣係對其他運動員唔公道。眼見煲呔曾前日見領導人時只係講起港足奪金一事，大輝七情上面促請煲呔曾唔好忽視其他運動員，反問難道乒乓孖寶同打羽毛球嘅葉姵延冇努力過咩？

煲呔曾今年去工展會消費勁減，仲辯稱話唔使佢托市。大輝係廠商會嘅立法會代表，今日聯同立法會「四散人」去捧工展會場，佢話最低消費就談唔上，但唔學煲呔曾咁就得，仲話若果個個好似煲呔曾咁消費唔掂㗎啦！

一切皆因煲呔曾亂噏所致，所以先畀大輝寸啫。既然講得咁差，煲呔曾不如封口啦！