吳斌尋日同傳媒會面時，被問到審計署批評嘅多個問題，有啲係佢前兩手留低嘅蘇州屎唔關佢事，咁有冇唔開心先？吳斌即刻好厚面皮咁話：「唔會。」仲話好似讀書咁，有批評先有進步。

本來以為佢咁講係話審計署批得啱啦，點知話口未完，佢就拎咗兩頁紙出嚟畀記者。係乜？原來係表列咗審計署報告部分內容，仲係針對審計署鬧佢出差報大數、去倫敦開會冇住主辦單位提供嘅免費住宿，同埋幫前專員搞餞別宴等等，而公署回應係已採取相應行動，呢啲表列嘅內容就係審計署嘅讚賞說話。吳斌仲話，據佢了解，審計署好少會讚人，所以審計署報告嘅讚賞，係對公署工作有一定嘅肯定。

唔係呀？帳委會嘅報告都未出，唔知鬧成點喎，唔通吳斌想搶先攞審計署報告嘅內容壓帳委會？跟住佢又話公署有兩百萬蚊盈餘，事關有個資深職員離職未請得番，而慳番嘅薪酬咪落咗儲備囉，唔似得其他部門驚會削減資源，臨尾使晒啲錢喎！

帳委會成員斥冇深切反省

佢又喺度博洗底，話公署唔係大花筒。但大家諗清楚啲，呢筆錢除咗用嚟做人工之外，根本唔郁得，試問點算係功績呀！咪以為講得多，大家就信以為真先得㗎！

對於吳斌嘅舉動，有帳委會成員私底下話從來冇人話吳斌冇做嘢喎，雖然佢改咗唔少嘢，但佢都唔係冇甩漏喎，佢今次咁做，可能因為佢覺得自己已紆尊降貴做呢個位，竟然仲畀議員玩，條氣唔順於是大反擊，但係要市民覺得公署做得好，係要行動去證明，唔係攞幾個表出嚟就掂。

有成員更指吳斌冇正視到公署嘅內部問題，攞番審計署報告嘅讚賞嚟省招牌，好聽啲係自我感覺良好，唔好聽就係死撐，咁反映佢根本係冇深切反省外，仲反過嚟要邀功。