小白觀點：不如攪少粒珠益街坊

畀個IQ題考考大家：「六合彩有幾多個字？」唔好炒蝦炒蟹住，以為呢條題目廢到爆，話明係六合彩咯，顧名思義梗係六個！哈哈哈，梗係唔係啦！天下間無奇不有，烏鴉都有白色啦。

呢嗱，前排就有市民買六合彩，竟然只係得印出五個號碼，如果中咗嘅話，真係口同鼻拗！不過計我話，馬會水蛇春咁長嘅附例一定閂晒後門，想有得賠都幾難。據講今次馬會賴係打印機出錯，先至印少咗一個號碼。喂，有冇咁兒戲呀？不如試試下次攪珠機少落幾十粒珠，只係得1、2、3、4、5、6號六粒珠攪呀攪；再唔係，當馬場一開閘，只係得三隻馬匹跑呀跑，等大家可以發個年尾橫財咁就好喎！

網友觀點......

Pete

嘩，咁都得，中咗真係喊三聲，都唔知張飛會唔會作廢。

輝仔

要馬會中咗五個字都當頭獎啦，依家係佢部機出錯喎！

笑笑

印五個字出來中咗可以當頭獎，咁又唔同，機會率都大咗啦！

Cherbe

買完都要睇清楚先，唔係中咗得個吉！

網址：www.sunsiupak.blogspot.com

阿豪觀點：當安慰獎派 蚊免爭拗

有單新聞好搞笑，話說有人買咗張六合彩電腦飛，點知每注得嗰五個字喎。嘩！好彩唔中啫，如果嗰五個字都中咗嘅話，咁到時真係審死官有排拗囉……

不如咁啦，下次一人讓一步，當買到呢張「五合彩」嘅市民，有中半個字嘅「底分」。嗱，雖然話印漏嗰個字，中嘅機率只係四十九分之一啫，但係話晒都係電腦出錯喎，咪一人讓一步囉。一唔係咁啦，既然「五合彩」咁難得至出現，不如直頭當二十蚊安慰獎咁處理啦！

點講都好啦，今次事主橫掂都係唔中，咪當係笑話一則囉。你知啦，家陣香港立立亂，唔係掟嘢落街就係深層次矛盾未解決，香港人都好耐冇開懷咁笑過咯。

網友觀點......

匿名

如果咁都畀佢中，馬會應該要畀錢啦，係佢自己電腦出錯吖嘛！

奧巴牛

下次可能四合彩，中嘅機會仲高，呵呵～～

英國勤

算佢好彩，五個數目字，下次出五個英文字！

運財童子

大家有冇發現，買親電腦飛，嗰四注號碼裏面有好多都係重複嘅，咁又會唔會影響中獎機會呢？

網址：www.lukchiho.blogspot.com