原來港府高官一樣係假環保，真搵笨。好似節能產品咁，叫市民一時用呢樣，一時轉嗰樣，但講一套做一套，根本就冇身體力行，自己其身不正，唔怪得藍天愈叫愈走咯。

嗱，港府話慳電膽耗電量比鎢絲燈泡少七成，鼓勵市民棄用鎢絲燈泡。照計，港府高官應該帶頭用慳電膽至啱數o架，點知佢哋個個好似手電筒咁，照人哋唔照自己。

呢嗱，原來煲呔曾住嘅禮賓府本身就係嘥電大戶，宴會廳同走廊嗰幾十幅名畫長期有射燈照住，用嘅都唔係慳電膽；另外，喺財政司司長、律政司司長、終審法院首席法官官邸，吊燈使用嘅居然仲係嘥電嘅鎢絲燈泡。

叮！小數怕長計，呢個嘥啲，嗰個嘥啲，計落都幾和味o架。不妨睇吓當局點解釋，行政長官辦公室承認，部分「有特殊用途」照明裝置冇用慳電膽，會考慮分階段轉用，至於幾時搞掂，冇講；政府發言人就話，高官官邸吊燈繼續用鎢絲燈泡，係因為未有合適嘅慳電膽喎。

不過，燈飾業界並唔認同當局解釋，依家節能燈泡已經克服咗技術困難，功能媲美鎢絲燈泡。好似LED燈咁，唔止可以根據喜好調校色溫，仲可以調節光暗添。正如環保人士話齋，港府環保「講多過做」，冇合適裝置只係藉口。

叮！高官唔以身作則，政府部門咪有樣學樣，齊齊假環保，甚至帶頭嘥電囉。嗱，機電工程署自命「節能先鋒」，新總部大樓用咗五千萬起再生能源設施，結果啟用之後用電量反而多咗四成；聲稱設計環保嘅廉政公署新大樓，用電量居然比預期多成倍。

話時話，港府搞環保不過做戲咁做啫。嗱，發電廠一向係排污大戶，當局對佢哋無可奈何，於是就整啲乜鬼停車熄匙措施嚟擾民添亂；見冇人吼，又推出個全民慳電膽大計撐場，搞出單煲呔曾「益親家」風波不特止，仲畀專家踢爆，慳電膽其實並唔環保，使用壽命短於預期，棄置後入面嘅水銀成分仲會造成嚴重污染添。

仲有更搞笑o架，理工大學開發出港產電動車My Car，當局反應冷淡，當本地薑冇料到。環境局局長邱騰華反而捨近求遠，去日本買電動車。點知呢次哥本哈根聯合國氣候變化大會選咗My Car做大會專用車，佢出席會議嗰陣又話樂見其成。人哋當係寶，港府當係草，依家仲要趁機抽吓水添，面皮厚唔厚啲吖？

高官帶頭唔環保，難為邱騰華喺哥本哈根仲話要同與會者「分享香港經驗」。睇嚟佢真係去錯地方，可以同人分享經驗嘅唔係氣候變化大會，而係氣候逃犯大會至啱。叮！