小白觀點：蛋治拆開食慢慢品嘗
做打工仔真係慘，人工唔見加多幾個錢，但日常衣食住行就貴到阿媽都唔認得。聽講雞蛋加價三成，糖又加價三成，遲啲喺本來平民化嘅茶餐廳食件蛋治飲杯奶茶，隨時要酒店價錢呀！
小白老弟計過自己嘅身家，都有七位數字㗎，不過係欠銀行嘅數目，如果稅單上嘅銀碼都當埋係，咁就仲發達，或者勉勉強強一個月可以落茶餐廳食到一餐嘅。
唔係喇，既然咁難得，咁就梗係要盡情享受吓啦，一份蛋治拆開食，頭盤舐吓啲牛油，主菜用刀叉享用麵包扒，至於塊蛋，當係甜品Cremebrulee就啱嘞；嗰杯奶茶當然唔可以求其，自己帶隻紅酒杯去慢慢呷，咁至值回茶餐廳價錢㗎嘛。
網友觀點......
Lisa G
嘩，遲啲食我最愛嘅餐蛋治咪起碼要三、四十蚊！點食得落呀！
詠 芝
飲杯凍奶茶都可能要二十蚊囉，諗起都可怕！
Queen
茶餐廳文化係香港獨有㗎喎，逼到佢哋要執笠咪死？連唯一大眾化食店都冇埋，冇晒人生樂趣咯！
匿 名
乜都加價，世界難撈，以前就話窮都可以餐餐食茶餐廳吖，依家窮都食唔到一個餐蛋麵呀陰功。
網址：www.sunsiupak.blogspot.com
阿豪觀點：趁仲食得起影相留念
歌仔都有得唱：「糖又加、鹽又加。」事實上加風已經打到嚟，有飲食業界表示，沙糖、雞蛋等價格升咗唔少，擔心農曆年後唔少小型茶餐廳都會被迫結業，捱得住嘅都要大幅加價。
早前豪伯同小白兄都喺呢度同大家討論過「窮到燶、食快餐」嘅現象，即係話酒樓生意下跌嘅同時，走平價路線嘅快餐店生意就逆市上升。當時豪伯已經語重心長咁奉勸各位，要好好珍惜仲有得食茶餐廳快餐店嘅日子，因為唔少中產人士都要去食物銀行申領救濟。
各位朋友，趁依家仲食得起茶餐廳快餐店，就好快啲去多幾次喇，去嘅時候不妨影低自己「最後早/午餐」嘅情況作為留念。
網友觀點......
周星星
以後去茶餐廳食嘢，變成奢侈嘅活動。
餐餐有米落肚
材料成本加，租又加，茶餐廳一個飯三十蚊，有二十五蚊去咗嗰度，搞到啲食物毫無質素可言……
匿 名
我依家盡量帶飯返公司食，出面閒閒哋食個餐都要三、四十蚊，再加價嘅話，真係難以想像。
朱標精
去街市買餸，咪又係愈嚟愈貴！
網址：www.lukchiho.blogspot.com