電過髮嘅女士都知道，電完髮之後最好兩日內唔洗頭，咁先可以令個髮型維持得靚啲、耐啲，原來陳淑莊出席論壇前去咗電髮，而個論壇一坐就成粒幾鐘，為咗捍衞髮型唔畀雨淋，所以佢先會用風褸包到實。

陳淑莊過往一直以長直髮清純Look示人，何解突然改造型呢？佢笑言直髮已留咗好耐，就連佢個髮型師都嫌悶，叫佢轉換髮型。佢仲自嘲已三十有八，年屆中女之齡，所以要轉個成熟嘅造型嚟配合真實年齡喎。

佢亦乘機藉自己年齡硬銷普選，話自己由少女等到中女都未有普選，點知李卓人都唔執輸，戲稱陳淑莊只不過係「中女頭」，但佢已經等到「中男尾」，暗示等咗好耐。