佢又話依家環球經濟雖然已見到復甦嘅「綠芽」，但根基仍未穩固，或會出現反覆，香港唔應該盲目樂觀。不過佢最後亦補多一句，話政府會喺較接近來年預算案發表時，根據最新嘅數據修訂對財赤數字嘅預測，為將來「打倒昨日的我」鋪定下台階。

又亂fing公帑自我宣傳

呻完窮之後，佢轉過頭又自打嘴巴，自爆會好似舊年咁推出預算案諮詢漫畫，配合已播咗兩個禮拜嘅電視短片宣傳預算案。舊年佢首次請街外人製作預算案電視宣傳片同漫畫冊，被批評浪費公帑大搞個人形象工程，而最後出嚟嗰份預算案，不但內容被評為史上最差，喺立法會亦錄得歷來最高嘅反對票數，顯示佢根本冇聽到透過有關宣傳片同漫畫收集到嘅市民意見，形同倒錢落海。今年佢仍堅持繼續咁做，反證政府根本絕對唔窮，真正將啲公帑亂咁fing嘅其實係佢自己！