由行政會議成員兼工聯會會長鄭耀棠牽頭嘅政制向前走大聯盟成立咗個幾禮拜，一直負面新聞多多，例如畀人笑佢喺網頁上將區徽變成飄零嘅落花，可能違反《區旗及區徽條例》。大聯盟可能見大家聚焦離晒題，於是急急補鑊。
大聯盟分別喺三份報章網頁搞網上簽名運動，但網頁設計就好失策。畀人鬧咗幾日，大聯盟終於攞番個完整嘅區徽做網頁設計，希望大家可以唔使再分神討論啲周邊新聞，例如「散花版」區徽。
不過唔知佢通知唔晒三間傳媒改設計吖，定係一再失策做漏嘢，尋晚仍然仲有一間傳媒嘅簽名網頁用緊「散花版」區徽。補咗鑊嘅版本，支持嘅網民有一類叫做有效嘅簽名，至尋日一共有六萬三千幾個，以此區別開搗蛋嘅簽名。棠哥戴住聖誕老人帽嘅相亦已被抽起，唔知要保護佢定係懲罰佢呢？