話說今年五月，馬會大董Simon葉錫安去意大利旅行，當時飲咗隻叫Vinsanto嘅酒，呢個酒名有聖酒嘅意思，係專供神父喺大喜日子飲用嘅，要釀製十幾二十年先會入樽，當時Simon嘗咗第一口之後簡直係一試難忘，返到香港都仲對佢念念不忘，咁啱嗰陣佢要幫新愛駒改名，於是就為佢取名做Vinsanto，因Vinsanto嘅味道似Sherry酒，所以中文名就叫「甜酒」。

「甜酒」喺澳洲出世，現年三歲，今年十一月開始出賽，依家跑咗兩場，但唔知係咪因為愛駒個名叫甜酒，唔想主人咁快換畫，所以仲未幫Simon贏支香檳走，不過咁，Simon每次提起佢都甜絲絲，睇嚟上次嘅意大利之旅仍然令佢相當回味。