東亞運曲終人散都一段時間，但德成局長似乎仲未酒醒，尋日又挖番東亞運賽事嚟講，仲話有人向佢示威添！東亞運咁多甩漏嘢，有人向佢示威不足為奇，奇就奇在咁又畀佢攞到嚟吹噓自己。

原來向佢「示威」嘅係幾名南亞裔嘅港隊曲棍球員。佢哋都喺東亞運奇迹性咁攞到一面銅牌，德成局長話當日佢都有去捧場，嗰場係由港隊對中國隊，形容場波非常緊湊，下半場結束時，雙方打成三比三平手，最後加時比賽係用「即時死亡」賽制，佢仲好肉緊咁話香港憑住後上嘅氣勢，喺第三分鐘攻入咗決勝嘅金球。

銅牌到手當然值得高興，但德成局長竟然形容呢場比賽贏得咁漂亮，應該同香港隊喺足球決賽贏日本不分上下。體育項目雖然無分彼此，但德成局長所言似乎有啲言過其實噃。

跟住佢仲講述香港曲棍球發展史，話香港嘅印度、巴基斯坦等南亞裔人士擅長打曲棍球，而港隊亦有四個隊員係南亞裔，仲係親兄弟嚟添，講到能夠有咁好成績都係因為曲棍球總會嘅功勞，然後又話總會喺○六參加佢轄下康文署嘅「學校體育推廣計劃」，令到曲棍球嘅發展愈嚟愈普遍。

之前一直懶理南亞裔人士

佢咁講，擺明係曲線讚局方嘅政策好，下屬推廣有方啫！之不過，佢唔好唔記得南亞裔喺香港屬於少數族裔，佢哋以前嗌破喉嚨話喺香港受到歧視，政府漠視佢哋嘅需求，但民政局一直都搞唔掂。

最終係點？喺司局重組後，少數族裔人權嘅範疇由民政局過檔畀政制及內地事務局，於是開展有關種族歧視嘅法例，搞咗一大輪先搞得掂。依家德成局長仲攞呢次曲棍球賽事嚟「示威」，攞塊銅牌當奪金，喺自己面上貼金，係咪有啲厚顏呀？