金融管理局前總裁任志剛九月尾離任後，一度告別繁忙職場生涯，去學點樣hea。事隔兩個幾月，佢尋日獲委任做中國金融學會嘅執行副會長，喺新一年來臨時重回職場。任總接受任命時笑得好開心，被問到出任新職同金管局嘅「過冷河」限制有冇衝突時，佢好淡定咁話：「執行副會長嘅工作係義務性質，同之前金管局嘅工作冇衝突。」
又係㗎，呢個位係就中國金融政策嘅大方向、大框架提供義務顧問意見，既冇真金白銀喺市場投資，更談唔上有利益，佢接受任命前肯定研究過利益衝突等問題啦。佢任執行副會長嘅中國金融學會係人民銀行旗下一個組織，由人行行長周小川做會長，下設理事會，有好多中國金融界嘅要員做成員，任總尋日接受任命後，講明會利用自己喺香港監管金融嘅經驗，為內地金融工作提供意見，佢仲睇好二十年後人民幣有條件成為繼美元、歐元之後嘅第三種國際貨幣。
不過，中國金融學會會址喺北京，以後每次開會或舉辦研討會，任總難免要由香港飛上北京，佢啱啱hea咗兩個月，就趕喺二○一○年來臨前，拿拿聲投入呢份新工作，難怪佢早前話佢離開金管局之後，始終唔係好學到點hea住過日子啦！