朱古力係令人快樂嘅食物，所以好多女士都鍾意食朱古力，立法會議員梁美芬更係不折不扣嘅朱古力迷，一得閒就去又一城嘅COVA歎番杯朱古力充電。
梁美芬既要忙議員工作，又要喺城大教書，但佢都會抽空去歎朱古力慰勞自己。COVA喺香港同九龍都有分店，梁美芬就多數去又一城嗰間，貪佢近城大又夠開揚，更方便出入。佢話，每次落去回氣都唔會偷懶，會攞定一堆文件落去做，佢話喺嗰度見到人來人往，可以睇到好多唔同嘅人生百態，加上成日都撞到城大嘅學生以及同事，會畀到好多靈感佢，所以佢經常一坐就係粒幾兩粒鐘。
身為媽媽嘅佢，有好嘢當然會同囝囝分享啦，所以歎完杯朱古力，佢就會行去隔幾間舖位嘅Godiva朱古力專門店買番啲朱古力粉返屋企沖畀佢哋飲，分甘同味。