建制派就五區總辭已開始布陣，據悉，重點搶奪陣地係九龍東、新界東同新界西三區，擁有龐大選舉機器嘅建仔同工聯會極大可能喺呢三區出兵，同泛民單對單競爭，餘下九龍西同港島，就預留畀其他有意落場練兵嘅親中政團搶灘，希望做到各家各派少爭少內耗。
建制派評估過，認為九東、新西同新東三區勝算較大，新東同新西分別由建仔嘅葛珮帆同陳恆鑌出擊，迎戰可能係社民連嘅梁國雄同陳偉業；至於九東，建制派可能由工聯會陳婉嫻或上次選舉排「橄欖」陳鑑林名單第二位嘅建仔中委黎榮浩出戰，對撼公文袋梁家傑，據講陣營內具分量人士仍游說緊嫻姐出山，未到埋門一刻，都唔知嫻姐會唔會再戰。
至於富貴黨田北辰則好有可能再戰九西。呢個太公分豬肉布局，最終能否成功擺陣，就要睇有關協調人士嘅功力嘞！建仔副主席蔣麗芸話，一旦有人請辭，建仔希望派自己嘅新人迎戰，呢個共識已獲黨內通過，仲話如果其他建制派人士覺得自己一定贏梗嘅話，咪出嚟一齊選過囉。