23/12/2009

播放本新聞相關短片

政情:李樂詩唔再帶團闖極地

一行十九人嘅名人南極探險團完成十九日艱辛旅程,尋日返抵本港,趕及同屋企人一齊做冬,探險團「盲公竹」、極地探險家李樂詩同時宣布榮休,以後唔再帶團。佢話自己年紀大體力有限,再難應付極地天氣環境,決定將帶團重任交畀新一代延續落去。

呢個探險團以香港專業及資深行政人員協會會長容永祺為首,尋日下晝抵港時,人人龍精虎猛,最生猛嗰個係港區全國人大代表羅范椒芬,佢話旅程有兩樣嘢最辛苦,一係坐探險船由阿根廷南部城市Ushuaia出發去南極,要途經大風大浪嘅Drake Passage海峽,包括容永祺在內嘅部分團員都頂唔順暈船浪,要攤喺床上休息。

第二樣就係行雪山,羅范話團員要行上一個約三百米高嘅雪山,雪深過膝,舉步維艱,要好多體力至做得到,佢就試過雙腳喺雪中掹唔番出嚟,要老公剷開啲雪救佢。儘管經歷幾許艱辛,但團員收穫好豐富,見到海豹同鯨魚之餘,又睇到企鵝孵蛋奇景,最難得係遇到一隻體形最大嘅「皇帝企鵝」,真係不枉此行。