出門漏帶銀包、鎖匙甚至電話係常有嘅事，商務及經濟發展局局長劉吳惠蘭（Rita）就有妙法解決，佢尋日喺科學園同傳媒回顧過去一年嘅工作成果，當場大派一款叫做「失魂魚」嘅電子警報器，呢個警報器係科學園培訓嘅公司Amos嘅產品，可以提醒機主漏帶咗乜嘢物件。
呢款名為BoboLink嘅「失魂魚」，一套三件，只要將警報器分別掛喺電話、鎖匙等重要物品上，若機主出門時漏帶其中一件，其他物件上嘅警報器都會響起鈴聲，提醒機主記得帶番。Rita自嘲年紀漸大，成日都會大頭蝦唔記得帶嘢，所以先會喺芸芸創新產品中睇中「失魂魚」，遲啲仲會買番個畀自己用添。
呢套「失魂魚」喺市面賣緊二百五十蚊，不過Rita一次過買成三十幾個送畀傳媒，幫襯之餘又幫手宣傳，難怪Amos肯以市價一半價錢賣畀Rita啦。