當晚司儀係Alex楊政龍，樣貌俊朗嘅Alex初次登場就以流利普通話做司儀，生鬼得嚟又識搞氣氛，毫不怯場，兼且出錢出力，送出由英皇鐘錶珠寶贊助嘅名貴鑽石頸鏈。本來想問佢會唔會投身娛樂圈，點知未開口，Alex已搶先回答話：「我知你想問乜！做明星？一定唔會！」

當晚嘅餘興節目係大玩猜啞謎遊戲同啤酒競飲，莊氏集團執行董事莊家彬（Albert）唔使十秒飲晒一大Jar啤酒，榮登「啤酒王」。楊孫西公子楊華勇、盧文端公子盧金榮當晚滿場飛，聯同施榮忻向Albert四圍敬酒。