五區總辭嘅政圈吹風多籮籮，坊間版本包括公文袋嘅梁家傑、陳淑莊，社民連嘅黃毓民、「長毛」梁國雄同「大舊」陳偉業會辭去自己代表嘅選區議席，並可能全部參加補選。呢啲政圈傳聞幾乎日日見報，想唔引起廉署關注都難啦。

本港選舉條例嚴格限制參加各級公職選舉人士嘅開支，避免賄選、財力營造人氣等不公平現象出現，公、社兩黨搞嘅五區總辭到家吓雖然都係口水戰，但名單、補選陣營有齊，執法機構再唔喝止，只會令第日補選嘅投訴多到做唔晒。

黃成智報漏贊助被警告

最好笑嘅係，廉署今次係透過白鴿黨嘅議員黃成智傳話。白鴿黨話咗唔參加五區總辭，點解廉署搵佢講呢？實情係廉署早前收到選舉事務處轉介，質疑黃成智喺舊年立法會選舉期間，去文具店買咗一百六十二蚊膠紙，不過文具店老闆實收黃成智一百六十蚊，黃成智冇申報文具店老闆兩蚊雞嘅贊助，最終被廉署警告。廉署跟開佢嘅嘢，咪透過佢警告其他泛民人士囉。

講開黃成智，佢透露好想囝囝文軒繼承佢嘅衣缽從政，不過，今年十七歲嘅文軒話自己對從政興趣唔大，黃成智惟有好感慨咁同囝囝講：「爸爸冇乜嘢可以留畀你，只有一間同黨友夾份開嘅餐廳。」睇嚟黃成智都已經幫自己鋪定後路。