小白觀點：為保財路一定要食腦

聖誕節臨近，有項調查發現援交少女為咗逃避警方放蛇，唔再大模廝樣喺網上搵客，轉而搞小圈子由熟客做馬伕。雖然此風不可長，但真係唔可以唔讚讚援交妹確係有遠見。

一直以嚟，好多人以為班口靚妹只係識得貪威識食，查實為咗有錢買名牌，佢哋唔會立亂破壞援交生態。我懷疑援交少女可能秘密開咗個地下「全港援交氣候峰會」，由各區援交領袖就減少被放蛇進行咗一連幾日嘅閉門會議，油尖旺同天水圍兩個最大援交強區嘅代表唔會各懷鬼胎，峰會冇爛尾之餘，最後仲達成咗一個「減蛇承諾」，佢哋都一致希望喺二○二○年前將被放蛇密度減低一半！

網友觀點...X）...

[　昌　仔　]

預咗係咁o架啦，講得好啲咪援交囉，衰啲咪私鐘妹！

[　Patrick　]

有客路，依家佢哋唔使靠上網搵飯食就真，做熟客好過。

[　希　媽　]

警察掃黃不力啦，睇吓依家啲人咁細個就援交，為錢乜都得，冇眼睇！

[　Juicy　]

援交可以行VIP制添啦，或者儲積分。

網址：www.sunsiupak.blogspot.com

阿豪觀點：心思轉去科研必成材

聽講最近有援交少女為逃避警方放蛇，唔再喺網上兜客，而改由熟客仔做馬伕。嘩，腦筋轉得咁快，如果好好鑽研科學，話唔定香港會出多幾個高錕添。

當然啦，呢樣嘢都係講吓笑嘅啫，冇做援交嘅佔大多數，但係高錕從來都只有一個。依家最大嘅問題，係社會人士大聲疾呼要幫助援交少女，但係援交少女就愈匿愈埋唔肯畀你幫，咁點搞先？

豪伯認為，除咗搵出援交少女源頭，輔導佢哋之外，係咪應該進行一下Damage Control呢？好似某性工作者組織咁吖，就曾經推動《恩客約章》，鼓勵恩客尊重性工作者，安全嫖妓，都不失為冇辦法之中嘅辦法啦。

網友觀點...X）...

[　蛇仔明　]

嘩，請唔請人先？我報名！

[　豬標精　]

其實你情我願，只要過咗十六歲，究竟有咩問題先？

[　匿　名　]

紫藤係咪應該出嚟講幾句，維護佢哋嘅權益呢？

[　winnniethepooh　]

咁有馬伕湊住，好似仲好啲，起碼冇咁易遇到變態嘅客，有咩事追究起上嚟都易啲啦。

網址：www.lukchiho.blogspot.com