筆者即使不知「法律面前人人平等」有冇好似愛情一樣，都係「你呃我，我呃你」，此刻不期然想起「法理」與「常理」的質疑。香港有些司法現象進展至令人匪夷所思的地步，像壹傳媒在台灣成為過街老鼠，在香港宣淫販賤卻獲禮遇有加，少少罰款等於激勵，難怪目空一切，使整個社會黑白顛倒、永無寧日。常理難求，「法理」自然如鏡中花、水中月，虛浮得不可捉摸。

內地貪腐嚴重，有時貪污一千幾百萬判死刑，有時貪污好幾億元卻判死緩，事後還說甚麼定罪準確、量刑適當、寬嚴相濟、貪污數額不是唯一的量刑依據。這種輕輕帶過、取巧胡扯的「法理」，自然難起阻嚇作用！

五把刀掟落街，雖不是「小李飛刀，百發百中」，依「常理」推測，掟一把刀罰二百元，唔小心跌把刀，感化一年？筆者內心在交戰：有日真係斬斬吓豬骨，唔小心連骨帶刀跌咗落街，我應該話「唔小心」還是「有意」？基於寬嚴相濟、飛刀數量不是唯一的量刑依據，筆者會認與o靚模女友爭執後，憤而斬豬骨洩憤，繼而掟刀落街紓壓。依「法理」，掟刀一把罰二百，另豬骨一舊五十，合共二百五十蚊，你認唔認罪？大人明察秋毫，蟻民伏法認罪。三分鐘前，入唔切咪錶都係罰三百二十元，掟刀落街，真係抵到爛！