尋日凌晨，三個外籍女遊客由尖沙咀搭的士去蘭桂坊，落車時，司機聲稱唔記得落錶，涉嫌向遊客索取四百蚊車資，對方覺得唔對路，拒絕畀錢，點知有人涉嫌鎖起車門，唔畀遊客落車，仲喺蘭桂坊一帶慢駛兜圈。後嚟對方叫來三個同行男遊客，雙方拉扯擾攘一輪後，三個男遊客被警方以涉嫌襲擊拘捕，司機就涉嫌非法禁錮被捕。

叮！本港的士從來都係明碼實價按錶收費，今次有人有錶唔用，聲稱唔記得落錶，你信唔信吖？就算真係唔記得落錶，尖沙咀到蘭桂坊有乜理由收成四百蚊吖？此時此刻，太一叮只會諗起兩個字──劏客！經此一役，你估呢幾位遊客會點樣向鄉親父老「介紹」香港呢？唉，真係諗吓都覺得閉翳。

更加閉翳嘅係，近期有唔少市民反映，隨住經濟好番少少，加上可能係東亞運嘅關係，部分的士司機好似唔憂做咁，態度愈嚟愈差，甚至開始出現拒載嘅情況。亦即係話，今次揭發嘅懷疑劏客醜聞好可能只係冰山一角，唔知幾多乘客中咗招，唔知又有幾多遊客乘興而來，敗興而返。

公道啲講句，全港的士司機數以萬計，難免良莠不齊，劏客嘅畢竟只係少數。不過，正所謂一粒老鼠屎攪壞一鍋粥，就算係極少數，都可能造成好惡劣嘅後果。正如有旅遊業界人士話齋，呢啲事件雖然係個別行為，但即使只有一宗，都會損害的士行業甚至成個香港嘅聲譽。以前曾經有的士改錶呃客，後嚟警方放蛇拉人，成功杜絕呢種現象，太一叮唔明嘅係，對於的士劏客及拒載，點解當局唔用相同手法打擊呢？

有消息指出，近年經常有一班無良的士司機喺中環纜車站外打躉，專門向遊客埋手濫收車資，夜晚山頂纜車停駛後，呢班司機就會轉到其他遊客區搵食。空穴來風，未必無因，既然業界反映有司機集結劏客，警方係咪要做嘢呢？

其實，的士行業之所以出現咁多亂象，歸根究柢，都係因為港府監管不力，有法不依，執法不嚴。眾所周知，的士行業人數眾多，組織鬆散，當局闊佬懶理，行業生態必定愈搞愈亂，愈來愈差，最後連正當司機亦無辜受害，無啖好食。就好似八折黨問題咁，當局既唔肯立法禁止乘客議價，又無膽開放自由議價，淨係搞個唔湯唔水嘅短加長減出來，結果八折黨繼續橫行，正當司機繼續受害。

開講有話，的士等於一個地方嘅旅遊櫥窗，的士司機就係旅遊大使，港府對的士行業放任自流，任由劏客醜聞不斷發生，等於自拆招牌，自毀長城，無論再使幾多錢去外國宣傳推廣，都係嘥氣，叮！