唔夠一個月，立法會再傳喜訊，今次係白鴿黨立法會議員涂謹申迎娶曾經做過記者嘅第二任太太。阿涂同太太蘇麗芬（Sue）嘅婚禮喺深灣遊艇會舉行，佢哋搵咗本身係律師嘅黨主席鐵頭仁幫佢證婚，婚禮以基督教形式舉行，好多政圈中人都有到賀。牧師宣讀經文，講到「生養眾多」嘅時候，全場即時起哄，好似催涂生涂太造人咁，新郎同新娘只能以笑應付。
其實阿涂早前喺立法會派餅，已經畀人問佢幾時派紅雞蛋，尋日可能已經預咗畀人玩。雖然成個婚禮都充滿笑聲，不過一對新人上台致辭時，講到兩人相戀過程，原來並唔係咁順暢。阿涂話初初拍拖都好驚，因為好擔心女方嘅家人唔接受自己嘅政治立場同背景；阿Sue亦坦承有呢方面隱憂，因為佢爸爸有濃厚鄉情，閒來鍾意回鄉探親，佢好擔心點同爸爸講自己要嫁一個冇回鄉證嘅男人呢？將來點返鄉下擺酒呢？
故事最後梗係過關，得到家人接受啦。尋日到賀嘅商界人士則有信和置業主席黃志祥同黃永光父子等。