馬圈名人尋日空群出洞，喺沙田馬場嘅香港國際馬匹拍賣會重錘出擊，「福建幫」頭領、全國政協委員盧文端追價多次，終以四百萬港元投得心頭好，並幫馬匹改名為「福建小子」。咁啱尋日亦係佢六十一歲生日，佢投咗呢匹美國良駒後，夜晚就會合家人，去灣仔著名法國餐廳Olala開生日派對，開心到飛起。
呢個派對食得夠豪，餐廳周老闆為「壽星公」預備神秘晚餐，頭盤係Olala招牌菜海鮮拼盤，由法國肥美生蠔、大西洋藍龍蝦同新鮮靚蟹拼成，其他菜式仲有秘方炮製嘅白酒煮青口、地中海紅蝦意粉、有機無花果沙律同法式油浸鴨髀等。除勁擦法國海鮮外，仲開埋七支法國佳釀，包括市價約三萬八千蚊嘅1990 Chateau Petrus同約三萬蚊嘅一九八二年Chateau Lafite Rothschild添。
東海聯合集團主席黃楚標尋日都用四百萬元投得一匹新西蘭馬，標哥話唔覺得貴喎，事關今年普遍拍賣價都要四至五百萬元。