經濟好轉，唔少打工仔都想跳草裙舞。瑪麗醫院行政總監賴福明快將退休，醫院管理局最快呢個禮拜會公布繼任人選。醫界傳聞，由衞生署借調過醫管局做質素及安全總監嘅衞生防護中心總監梁栢賢，一度係接替賴福明嘅大熱門，不過有消息話，梁栢賢唔想跳草裙舞，最終都冇申請呢個位。
前晚衞生署眾高官同傳媒會面，梁栢賢都有出席，佢話依家喺醫管局總部有大堆嘢要做，如果佢過去瑪麗，醫管局會頭都痛埋，佢惟有留番喺度幫手喎。佢仲羅列一堆手上要處理嘅工作，包括醫院認證、病人電腦病歷、避免調錯病人同調錯屍嘅病人身份確認等等，連宣傳餵母乳都要佢啃埋，難怪佢唔敢「起舞」啦。
雖然係咁，都最少有四個重量級人物申請做瑪麗一哥，包括九龍東聯網總監陸志聰、新界西聯網總監盧志遠、瑪麗醫院副行政總監陳志權同葛量洪醫院行政總監李文豪。瑪麗醫院行政總監身兼港島醫院聯網總監，職責好重，呢個位真係唔易做o架。