工展會尋日開幕，煲呔曾諗住做人辦去帶頭消費，但佢嘅表現就似做騷多啲，兜咗幾個圈，只係使咗一千八百幾蚊，比舊年用咗超過一萬蚊大縮皮，仲衰過發展局局長林鄭月娥，因為好打得嘅林鄭都揼咗三千幾蚊出嚟振興經濟。煲呔曾解釋今年使少咗係因為唔使再刺濟經濟喎！啱啱先傳嚟有製作公司大裁員嘅壞消息，煲呔曾呢個說法真係自欺欺人噃！
煲呔曾錫住荷包例子多多，○七年工展會，做騷式巡場只係用咗八十五蚊買條民族頸鏈；舊年春節逛維園花市，都只係用咗七百零蚊買咗幾盆年花；今次巡工展會又點呢？佢同太太揀咗間食品雜貨店幫襯，買咗啲椰子糖、年糕同米通，只係使咗五百零蚊，跟住又去文具精品店，買咗六十套立體砌圖，都係盛惠一千三百八十蚊，成場大騷只係用咗唔超過二千蚊。
不過，尋日陪煲呔曾進場嘅林鄭就唔同嘞，佢先買部攪拌機，豪使三千幾蚊，跟住蝦子麵、烏冬同醬油樣樣執啲，總數肯定揮低煲呔曾啦！林鄭仲話：「嚟得工展會冇理由唔買嘢o架！」