杜鵑提早泣血

黑英尋日喺電台節目《香港家書》中撰文提醒香港人，話本港已經出現好多氣候暖化嘅問題，譬如過去杜鵑花只會喺三、四月嘅春天先綻放，但近排到處已見杜鵑泣血；夏天盛放嘅鳳凰木就遲遲未謝，深秋仍在爭艷，似乎花草樹木都被暖化氣候搞到亂晒龍。

一般人見到冬天嘅和暖陽光、明媚嬌花都會好開心，不過，黑英就話香港樹木嘅表現顯示冬天已經喺呢個城市消失咗，喺深秋見到春天，更令佢不寒而慄。近排好多市民都喺網上討論北極暖化、搞到熊無立足之冰，可見氣候問題已引起廣泛關注。

黑英做台長時已經好關注全球暖化，今次放下優哉悠哉嘅退休生活，大談哥本哈根氣候會議，佢話：「部分在歷史上排放了大量二氧化碳的發達國家，並沒展示出負責任的大國風範，仍在精心計算、嚴格要求發展中國家犧牲改善人民生活機會去減少排放二氧化碳。」佢警告嗰啲只着眼一國眼前利益嘅行為係短視同危險嘅，明撐中國喺氣候會議嘅立場。

唔講唔知，黑英有份參與聯合國政府間氣候變化專門委員會撰寫二○○七年發表嘅氣候變化報告，研究咗好多數據，今次咁高調評論，唔通佢有心將來做香港嘅全球暖化研究專家？