小白觀點：愈噓愈興奮咪畀佢得逞

繼唐唐日前去中大攞博士學位時畀人踩場搞寸Party後，煲呔曾去大球場睇東亞運動會賽事，以為自己係大明星向觀眾揮手，即刻畀人噓爆，真係瘀到冇朋友。換轉係小白老弟，即使搵唔到窿捐，都會隨手攞個環保購物袋笠住自己，難得佢老哥將噓聲當係歡呼聲，真係冇佢符。

話時話，大家下次再見到煲呔曾做親民騷，就當係日頭撞鬼，合埋雙眼心中默禱「睇佢唔到，睇佢唔到，睇佢唔到」就算罷啦，再係咁噓法，佢會以為自己係劉翔，即刻身水身汗走落場，阻住睇比賽事小，萬一亢奮起上嚟，除埋件衫掟上看台，市民為免被擊中慌忙走避，隨時會釀成人踩人慘劇o架！

網友觀點...X）...

[　michael chan　]

哈，真係瘀爆，我係佢就靜靜哋坐好算，揮咩手吖！

[　TingTing2009　]

明知自己民望咁低就唔好揮手啦，自己攞嚟瘀。

[　yoyo　]

唐唐畀人踩場已經夠樣衰啦，點知煲呔曾仲勁，司長級行出嚟都咁冇威信，真係醜死人！

[　阿凡達　]

東亞運動會香港係主場，特首畀人噓，真係羞家。

網址：www.sunsiupak.blogspot.com

阿豪觀點：享超凡待遇與老董看齊

煲呔曾真係唔受歡迎。佢大前晚去香港大球場睇東亞運賽事，點知一入場，看台上竟然噓聲四起，呢一種待遇，恐怕只有佢嘅前任老董至有資格享受咯！豪伯記得當年老董入馬場主持敲鑼儀式，點知畀馬迷噓到爆廠。又難怪嘅，賭仔最講究「老唔老利」，老董腳頭有幾好大家都知，搵佢入去敲鑼，效果同向馬迷「贈書」冇咩分別？

講番煲呔曾，佢EQ之高又真係唔到你唔服，你噓佢咩，佢一於少理，攞住部相機係咁影。不過煲呔曾都唔係最厲害，最厲害都係香港足球代表隊，喺煲呔曾負能量影響下，仍然能擊敗北韓殺入決賽，兼且贏埋金牌。咦，睇嚟香港足運真係有啲起色喎……

網友觀點...X）...

[　霸　姬　]

做特首做到咁，都幾慘……

[　亞拉丁　]

搞東亞運搞到一鑊泡，仲懶醒咁走去睇比賽，以為會好受歡迎咩？唔噓佢就奇！

[　匿　名　]

搞到要畀人噓，煲呔曾嗰一刻應該知道乜嘢係「傳奇一刻」喇啩！

[　雞強1224　]

其實都幾抵噓，由賣飛、安排運動員練習、住宿同義工做嘢都有出錯，搞個咁細嘅運動會都搞成咁……

網址：www.lukchiho.blogspot.com