向壹淫媒亮劍，台灣當局當機立斷，手起刀落，除淫務盡，認真好嘢。而民眾同仇敵愾，為保住社會道德底線，對掛羊頭賣狗肉，利用動畫手法販賣色情暴力嘅壹淫媒群起而攻之，同樣功不可沒。

正所謂，順民意者昌，如果畀淫賤黎亂嚟，眼白白睇住下一代有樣學樣，台灣永無寧日。除淫懲奸首戰告捷，社會消除咗隱患，呢次唔止係市民嘅勝利，亦係全台灣嘅勝利。

除咗宣淫販賤，壹淫媒仲有一手叫做「老作」。呢嗱，台灣《壹週刊》又畀人踢爆生安白造，將馬英九為答謝總統府義工開嘅座談會，講成係馬英九想將民望急跌歸咎於負責接聽民眾陳情嘅義工。所謂「報道」完全係捕風捉影，毫無根據，總統府發言人王郁琦直斥，壹淫媒根本就冇求證過，咁嘅做法「非常懶惰」。

嗱，呢啲咪叫做正氣凜然囉！壹淫媒掛羊頭賣狗肉，你畀佢經營電視台？肯定教壞細路，絕對誤盡蒼生！講到呢度，太一叮忍唔住要吶喊助威：台灣人民好嘢！台灣政府好嘢！恭喜台灣成為抗淫聖地！

睇番香港同內地，當局正邪不分，忠奸不辨，對淫賤黎包庇縱容，甚至同流合污，任由壹淫媒肆意荼毒青少年。所以，台灣抗淫「聖戰」節節勝利，中港兩地卻淪為烏煙瘴氣嘅「性地」。

壹淫媒搞到香港社會風氣敗壞，連內地都畀佢搞臭埋，轉頭害番港人添。呢嗱，本報尋日踢爆，內地十幾個專門渲染誇張「性技巧」嘅鹹濕電台節目，已經攻陷本港大氣電波，新界北更加係重災區。居民投訴，當局只係話會向內地了解情況。

嘥氣啦，所謂了解，咪又係不了了之。其實，如果冇人包庇護航，中港兩地嘅社會風氣又點會淪落到咁嘅地步吖。壹淫媒不斷叫囂「天滅中共」，淫賤黎甚至狂罵國家領導人係「大陸佬」、「short short哋」。奇就奇在，「大陸佬」居然與敵為友，除咗放任壹淫媒旗下報刊喺深圳等地賣通街外，中資機構仲明助暗縱，當年壹淫媒陷入財政危機，居然送上及時雨，泵水幫佢哋上市，仲喺淫媒刊登廣告。

叮佢個鎯鎯！「愛國無前途，反中有運行」，如果中港兩地都好似台灣政府咁，攞出金猴奮起千鈞棒嘅魄力對付壹淫媒，淫賤黎又點可能咁猖狂呀！