作為全港最大工會嘅統帥，真係日日做到冇停手。有工聯會「吳啟華」之稱嘅理事長吳秋北，今年九月捨棄醫管局份高薪厚祿，全情投入工會工作後，上任大半年以嚟，旗下百幾個屬會嘅會務樣樣都關佢事，會務已忙得不可開交，仲要應付四方八面嘅應酬活動，私人時間大減。
俗語有云「在其位司其職」，吳秋北唔敢有半句怨言，但唯獨對三個囡囡放心唔落，事關最大嗰個得七歲，最細嘅只有四歲幾，又真係心掛掛嘅。
所以佢寧願每朝六點半起身，先照顧就讀小學嘅大女返學，接連再陪伴兩個細女。他形容朝早要同三個女搏鬥一輪之後，先拖住疲乏嘅身軀返工聯會搏殺，處理會務同應酬，夜晚返到屋企，囡囡都已經覺覺豬。
見屋企人時間已經少，吳秋北喺北京社科院讀嘅批評文學博士學位亦未有時間埋尾，仲爭答辯部分未完成，所以未畢到業，睇嚟一日四十八個鐘先夠佢用。