尋日立法會討論劉健儀提出嘅譴責甘乃威動議同阿Paul謝偉俊提議嘅終止調查動議，阿Paul以一個頹廢浪子Look登場，滿臉鬚根嘅佢，上身着住件佢最愛嘅深色中山裝，扣埋個珍珠碎鑽貓頭鷹扣針，但係下身夠膽死襯對黑色漆皮Converse，認真夠頹。加埋佢發言嗰陣鬼咁激動，成個憤青咁，真係同佢個Look好鬼襯。
阿Paul話佢以前做大律師嗰陣都留過鬚，後來轉做律師先冇留，上個禮拜佢同白姐姐去夏威夷叉電，所以冇剃咗幾日鬚，佢見依家個Look幾有浪子Feel，所以都諗緊好唔好繼續留。人哋話浪子回頭金不換，依家阿Paul又想做番浪子，睇怕白姐姐都要買定驚風散看門口，隨時攞嚟定驚囉。
