立法會旅遊界代表謝偉俊一早講明，尋日會提出動議終止調查甘乃威事件嘅議案，加上社民連議員黃毓民提出五區總辭動議辯論，立法會估計尋日嘅大會未必可以即日開完，所以預留時間今朝繼續。為咗咁，討論兩電加電費嘅經濟發展事務委員會都要讓路，提早喺禮拜二開。
點知最後只有約二十名議員就甘威事件發言，傾咗四粒幾鐘就完，而緊接其後、由專業會議議員梁美芬提出嘅議案，回應嘅就係發展局局長林鄭月娥，所以林鄭唔敢走開，乖乖留喺立法會睇直播，難怪林鄭回應時都呻搞到夜晚八點幾連晏晝飯都未食。
事後林鄭話，原先佢估唔到甘威嘅辯論咁快完成，仲話如果係有十個議員排隊嘅話，佢早就去咗食飯先啦！其實班議員好多時都唔會按定發言掣，所以班高官根本唔知仲有幾多議員發言。