繼身兼旅遊業議會主席、經濟動力成員胡兆英喺上個禮拜「單刀」開記者會力陳高鐵對香港經濟發展嘅重要性後，另一成員、香港酒店業主聯會執行總幹事李漢城，尋日亦夥拍現代管理（飲食）專業協會主席盧浩宏，再次以同一議題會見傳媒。
李漢城話依家內地旅客佔訪港總旅客量超過四成，高鐵通車後，有助將內地客源由大珠三角擴展至長江同黃河以北嘅地區，帶動嘅經濟效益難以估計。反之，香港唔起高鐵，將會被鄰近城市趕上，最終被邊緣化。
其實李漢城同胡兆英講嘅都係大同小異，但經濟動力派出各行各業嘅成員逐一表態支持高鐵，好似打游擊咁逐個走出嚟舉腳支持起高鐵，一來可以製造更多支持嘅輿論，二來可以藉此令經濟動力嘅成員有更多曝光機會。
