之前講過專業會議立法會議員「大舊石」石禮謙喺上月三十號突然心痛，即晚入醫院做通波仔手術，呢次手術十分順利，翌日已冇大礙可以出院，尋日見大舊石健步如飛返立法會開會就知佢冇事。
通波仔手術簡單嚟講係將個波仔放入心血管，然後再放入支架將血管撐大。計埋今次手術，大舊石喺九年內已做咗六次手術，佢仲笑笑口咁話依家身體裏面總共有十四條支架，可想而知佢嘅戰績有幾「彪炳」！
大舊石愛美食，所以一講到戒口佢就好失落，苦笑話依家乜都唔食得，最多只係食菜，甚至連酒都要少飲為妙。話時話，身形有番咁上下嘅大舊石做完手術個幾禮拜，就可以返立法會開會，亦唔覺得佢有明顯瘦到，但點都好啦，為咗身體好，佢都係乖乖戒口啦！
