金勞詹不惜自揭瘡疤，重提九八年自己偽造文件罪成入獄一年、因而被褫奪立法會議員資格一事，指當年初審罪成，都未等二審同終審，立法會已急不及待逐佢出議事廳，完全唔尊重程序。金勞詹順勢借題發揮，批評部分議員攞住民主嘅招牌，以達個人私欲，「尤其係代表法律嘅」，矛頭直指公文袋班大狀。

唔肯收回言論

面對法律界代表吳靄儀喺甘威事件上出爾反爾，最初堅持要提譴責動議，依家又第一個撲出嚟反對，金勞詹更加火爆，直斥吳靄儀以為自己係法律界代表就惡晒，當成個立法會佢玩晒！金勞詹擺明係要棒打呢班如狼似虎嘅大狀。

金勞詹鬧到青筋暴現，吳靄儀投訴佢言論有冒犯性，立法會主席休會退席睇帶後判要金勞詹收回言論，但佢唔肯，反指有人對號入座啫。

除金勞詹外，阿Paul謝偉俊亦批評吳靄儀一時話一定要查，一時又話唔使查，分明係佢做人矇查查；又叫佢有錯咪認囉，千祈咪一錯再錯！建仔嘅劉江華之後直斥吳靄儀打倒昨日的我；議監會主席梁劉柔芬都揶揄呢位公文袋大狀，話佢身為議事規則委員會主席，又係法律界代表，應該好熟例，所以咪信佢囉，點知最後變咗另一回事。吳靄儀頓時變咗眾矢之的。

金勞詹喺接住嘅五區總辭冇約束力動議辯論上繼續開炮，矛頭再指向公文袋，批評身為專業人士嘅議員，當選又辭職，係欺騙選民，重申如果泛民五區總辭成事，佢會係第六個辭職嘅議員，落場同泛民鍊過。

金勞詹把嘴好似機關槍咁一輪掃射，仲投訴主席平時唔夠權威，壓唔住梁國雄搞搞震；又話泛民係打算五個選區各有一人辭職，而非「五區總辭」，議案題目唔啱；加上香港冇公投法，批評主席唔應該批准議案辯論喎。