小白觀點：比電影精彩百倍

唔怪之得依家咁少人入戲院睇港產片啦，事關現實生活中發生嘅事情，其荒謬離奇嘅程度，編劇度十世都未必度得出。好似話政府截聽風雲，真係比電影精彩百倍，抄錯冧把勾錯線一條龍出錯，依然繼續竊聽，真係唔係好明解。

最弊就係有嗰位神秘而傲慢嘅Z主任喺度起晒槓，唔止小市民唔知內情，連胡國興專員都管唔到。冇辦法，小白老弟只可憑自己嘅想像力還原案情，話唔定錯有錯着，勾錯咗條好過癮嘅線，既可以聽到口靚模內幕交易消息，亦聽見有名女人爆粗鬧富豪，咁過癮，梗係聽到津津有味、欲罷不能啦。嗱嗱嗱，Z主任，唔好咁獨食好喎，放上網公諸同好啦！

網友觀點……

Lulu886

呢套實況竊聽風雲好睇囉，勾錯線已經好離譜，仲加插作反抗命，真係亂晒龍。

金田一

我懷疑唔係勾錯線，實情係想截聽某啲秘密，扮勾錯線仲delete埋啲證據，以為可以瞞天過海。

美宜

呢單嘢咪睇到晒政府部門做嘢幾咁兒戲囉，市民真係冇保障，畀人偷聽咗乜嘢都唔知。

Tim

主任Z咪似劉青雲個角色嗰team人囉，又神秘，咩都做得出㗎喎。

網址：www.sunsiupak.blogspot.com

阿豪觀點：執法部門大支嘢

啲執法部門真係離晒大譜，警隊成日喺FOXY洩密，其他執法部門亦唔見得好好，激到截取通訊及監察事務專員胡國興紮紮跳，話有啲直頭當佢冇到，有啲就畀流料佢。

講真，小市民私隱冇乜保障已唔係新聞。你睇吓我哋有點樣嘅警隊同私隱專員公署，就知咩一回事啦。不過今次事件裏面胡官真係一語中的，佢話有執法部門存在反叛心理，甚至有人覺得胡官「你管我做咩？喺度搞搞震！要應酬你！」

的而且確，無論係執法部門侵犯市民私隱又好，公立醫院打錯針輸錯血都好，總之就係一句話：我哋做緊嘢，你哋做乜喺度搞搞震阿芝阿佐？

網友觀點……

匿名

真係離晒大譜，小市民以後乜嘢私隱都冇晒囉。

草民

每次截聽出錯，ICAC出嚟道歉就算，擺明係人為疏忽，應該有人出嚟承認責任同辭職謝罪！

釣魚郎

胡官今次真係有型，係要有人出嚟喝吓班友至得嘅！

尖子

有人或會認為，自己行得正企得正，怕咩畀人勾線？但執法人員做錯嘢要受罰，係另一回事。

網址：www.lukchiho.blogspot.com