01/12/2009

播放本新聞相關短片

台灣雷霆轟淫媒 香港何日送瘟神

乜嘢叫做瘟神?就係瘟疫傳播者,佢哋無論去邊度,都會搞到「五情亂雜」。淫賤黎就係一個大瘟神,其他唔在講,淨係宣淫販賤呢家嘢,已夠晒神憎鬼厭。更令人氣憤嘅係,佢搞到香港世風日下、道德淪喪仲未心足,又將魔掌伸向台灣。

台灣爛果報近排推出「動新聞」,其實係掛羊頭賣狗肉,用電腦動畫包裝腥色羶,繪影繪聲重演獸父姦女等色情暴力事件,令人反胃不特止,仲喺受害者傷口灑鹽。叮!

壹淫媒挑戰法紀同道德底線,激起民憤,台北市長郝龍斌三日內雷霆五招痛擊,包括連續重重罰款,仲禁止爛果報入校園,教育部同台中市亦計劃跟進,淫賤黎變成過街老鼠。

爛果報開頭仲死撐,居然聲討台北市政府搞「戒嚴」,仲話要向郝龍斌提刑事控訴,囂張至極。之不過,郝龍斌一身正氣,又點會被佢嚇窒。市政府講到明,對動新聞嘅開罰已係最保守嘅措施。淫賤黎平時聲大夾惡,其實只係一隻紙老虎,當局一企硬,佢就死死氣認衰,向社會道歉,又撤銷對市政府嘅控訴。

淫賤黎其實係錯估形勢。佢受港英餘孽長期包庇,喺香港無論點樣渲染色情暴力,當局都裝聾扮啞。壹淫媒已累積違反《淫褻及不雅物品管制條例》過百次,案底厚過電話簿,但係次次輕判了事,最高罰款只係五萬蚊咁大把。當局刻意包庇,令淫賤黎淫膽包天,佢以為天下烏鴉一般黑,又點諗到會喺台灣撞大板?

台北當局嚴懲淫媒,大快人心,但轉頭睇番香港,就好難笑得出聲。香港爛果報亦推出動新聞,今年以來,影視處共收到八宗投訴,指動新聞內容涉及血腥及不雅,但影視處話,經調查後冇發現違反淫審條例,咁就放生咗淫媒。事實上,影視處同埋淫審處,最叻就係選擇性檢控,同樣嘅內容登喺正義傳媒上就評為不雅,要受檢控,登喺淫媒上面就乜事都冇,呢種畸士多不勝數。叮!

香港當局包庇淫媒,自然引起公憤。曾被壹淫媒屬下《壹本便利》刊登濕身相嘅受害人李蘊話,傳媒應自律,本着社會良心,唔應該為求銷量發布淫褻、不雅及暴力資訊,以免教壞青少年。香港教育評議會副主席何漢權直言,港府應該好似台灣咁樣,如果媒體被定性為對青少年有害,學校就唔准訂閱,以免荼毒青少年。婦女權益聯盟副總幹事伍婉婷就話,港府一早就應該收緊監管,寧緊莫鬆,要回應市民訴求,立刻改善監管制度。

嗱!咁就叫做公道自在人心喇,香港當局如果繼續包庇淫媒,一定人心喪盡,而淫媒會更肆無忌憚,香港永無寧日。

「掃帚不到,灰塵照例不會自己跑掉」。毛澤東當年嘅名言至今仲有現實意義,大家要拎起弘揚正氣嘅大掃把,將大瘟神掃入歷史垃圾堆!