01/12/2009

播放本新聞相關短片

政情:博客擂台:污染指數也造假

小白觀點:高官買定飛等上方舟

有大學踢爆環保署監測污染指數有造假成分,原來空氣監測儀離路面五米高,同正常人嘅身高差咗一大截,得出嚟嘅數據當然得啖笑啦。其實呢個時代真亦假時,假亦都係假,有乜咁奇啫,不過唔好話小白老弟陰謀論,當局長期冚住污染指數,背後可能有個不可告人嘅秘密!

你知啦,如果市民知道真實數據,好易會造成恐慌㗎嘛,咪以為嗰套末世電影嘅情節冇可能發生呀,話唔定三司十二局官員同埋啲有錢佬,好多已經秘密買定船飛。幾年後特區毒霧瀰漫,小市民快要嗆死之時,千祈唔好唔記得打開電視,睇吓環境局局長邱騰華安安全全喺「挪亞方舟」上同你講拜拜喎。

網友觀點...X)...

[ 千 代 ]

政府成日造假數字呃市民㗎啦,信一成都死呀!

[ 港 仔 ]

空氣污染爆晒燈好耐啦,係香港人咁捱得㗎咋。

[ 造假王 ]

監測儀再放高啲吖笨,空氣質素一定非常清新,咁香港就成為藍天城市啦!

[ SamSam ]

政府根本就做唔到環保改善污染,咪做埋啲呃人呃自己嘅嘢囉,咁係無能嘅表現。

網址:www.sunsiupak.blogspot.com

阿豪觀點:樓層篤數為住客着想

咪以為淨係內地先至造假叻,依家就嚟一國一制㗎喇!有大學用自己製作嘅儀器測量本港空氣污染指數,得出嘅結果比環保署公布嘅高兩至三倍。鬼咩,原來環保署放喺路邊嘅儀器成五米高,乜嘢污染物都淡晒啦!

嘩,真係愈諗愈心驚喎,啱啱同小白兄先鬧完十九環保招實行後,市民壽命先至增加一個月咁大把,依家諗諗吓,都唔知係咪篤數嘅啫!

不過呢單空氣污染指數造假疑雲,都為大家提供一個好重要嘅訊息,就係原來身處愈高嘅位置,空氣質素係愈好㗎,唔怪得四十層樓高嘅大廈,頂樓居然係八十八樓啦!原來都係想住客覺得空氣好啲,咁自然都健康啲!

網友觀點...X)...

[ 傻 仔 ]

嘩,唔好將啲探測儀器放喺離島?

[ 矮 仔 ]

嘩,咁我生得咁矮,咪命都短幾年?

[ 成也風雲 ]

所以呀,高尚住宅都係起喺山頂囉,風生水起吖嘛……

[ 卜勤二世 ]

空氣質素都可以取巧,咁點知政府公布嘅失業率、通脹數據嗰啲嘢係堅定流㗎?

網址:www.lukchiho.blogspot.com