泛民主派就五區總辭嘅爭論愈搞愈胡鬧，早前白鴿黨元老司徒華大玩踢爆，指以淫賤黎為首嘅「搞事四人幫」，搞咗個黑箱飯局威逼佢轉軚支持五區總辭，暗示建議背後有不可告人嘅政治目的。一直力撐總辭嘅社民連主席黃毓民就炮轟年近八十嘅華叔「智慧同年齡成反比」，繼續隔空對罵。
毓民見勢色唔對，兩日前又突然話如果白鴿黨擔心「先總辭、後表決」會令泛民喪失對政改方案嘅否決權，大可改為「先否決、後總辭」。但佢黨友「長毛」梁國雄同「大舊」陳偉業大表不滿，堅持要盡快辭職。點知毓民跟住又反口，話係測試白鴿黨，仲反責傳媒嘅報道唔準確。
社民連尋日喺黨團會議後舉行記者會，但毓民同長毛都唔見影，得番兩名副主席陶君行同李偉儀負責解畫。不過記者最後都喺毓民嘅議員辦事處外等到佢，仲追到入電梯做訪問，逼到佢一度發火。
毓民衰多口闖禍，仲故意避記者搵陶君行同李偉儀嚟擋箭，佢以後鬧啲高官信口雌黃逃避問責時，就唔該唔好嗌咁大聲喇！