相信唔少蟹癡都鍾意膏肥肉厚嘅大閘蟹，立法會進出口界議員「象哥」黃定光亦唔例外，仲要一個禮拜食足五日，事關佢喺中華出入口商會會所擺下連場蟹宴，請啲高官同友好擦靚蟹。同啲高官食咗咁多餐，象哥仲有新發現添！係乜？咪以為男高官先擦得，原來女高官擦得仲勁。
象哥話早前請過政制及內地事務局局長「林公公」林瑞麟同副局長黃靜文嚟擦蟹，席間大家冇乜傾政治。點解？佢話林公公喺議事廳畀啲同僚質得多，算係畀番餐安樂茶飯佢食喎！
煲呔曾呢幾年亦冇嚟過，因為安排佢擦蟹，事前工夫太麻煩，都係免嘞！而佢嘅「真兄弟」財爺鬍鬚曾，象哥斬釘截鐵咁話唔請。唔通同佢有仇？咁又唔係，象哥話費事害佢啫，請佢食過第二樣啦！咁食乜呢？佢諗極都諗唔到，於是有記者就話不如請佢食白果喎！
咁又係嘅，鬍鬚曾早前通完波仔，再食埋啲咁高膽固醇嘅嘢，容乜易血管又塞過㗎，到時就累己累人啦！所以佢話自己好番晒，其他人都未必盡信。