過咗濠江搵食嘅港交所前行政總裁「神童」鄺其志，喺上個月二十一號好低調咁娶新抱，囝囝鄺之彥同未婚妻孫凱寧拉埋天窗，神童就出動部私伙平治豪華房車「KC 1300」做花車，「KC」正係「其志」嘅英文縮寫。
神童兩公婆當晚相當高興，問神童想唔想三年抱兩？飲到High咗嘅佢就笑笑口咁話：「有邊個唔想吖！但邊到我哋話事吖！」
神童娶新抱，各方好友畀面出席婚宴。據聞佢新抱修讀法律，仲係靚女一名添，難怪每個出席婚禮嘅賓客都讚不絕口。「媽打」李麗娟祝願一對新人白頭到老，永結同心，最緊要係早生貴子；賭王何鴻燊四太梁安琪就話生育嘅事，後生會識諗，反而最緊要係夫妻恩愛喎。
