新世界發展執行董事鄭志剛，舊年帶領周大福收購國產名牌海鷗錶並引入香港分一杯羹，作為現任掌舵人嘅阿爺「彤叔」鄭裕彤就力撐乖孫，經常戴住隻海鷗牌真金陀飛輪手錶出入以示支持。
一向吸引城中名人幫襯嘅富聲魚翅海鮮酒家，位於銅鑼灣嘅分店尋日開幕，酒家老闆盧振聲嘅伯爺盧德光同彤叔分屬順德同鄉兼老友，所以彤叔畀面出席剪綵。剪綵之後，見彤叔同盧德光傾得好投契，原來傾緊大家手上同一款嘅海鷗牌真金陀飛輪手錶。
盧德光話隻海鷗錶係彤叔幾年前送畀佢，用真金打造，當年售價都要二十萬元，依家有冇升值就唔知嘞！彤叔幾年前已睇上海鷗錶，莫非佢戴過覺得好之後提議乖孫出手收購？抑或兩爺孫心有靈犀呢？
