行會成員白人工

唔知係咪基於少做少錯、唔做唔錯嘅原則，所以佢連呢個禮拜二嘅行政會議都決定暫停，以免一時錯手又通過啲倒行逆施嘅政策同法案，進一步激起民憤。但佢採取呢種龜縮隱形嘅消極政策，同一眾行會成員集體偷懶蛇王，最終受害嘅都係香港市民。

一來即使行會冇會開，成班行會成員嘅人工亦照樣袋袋平安，停一個禮拜會就等於白白浪費十幾萬元公帑；二來行會唔開會，就乜嘢政策法案都通過唔到。

政府原定喺今個立法年度內向立法會提交二十二條法案，條條都有待行會通過，截至聽日嘅立法會大會，政府只係交咗三條咁大把。如果行會再係咁休吓停吓，餘下嗰啲一係積到立法年度尾先一次過匆匆上會，一係就被迫押後到下個立法年度先提交。