本來已經係弱勢政府，話口未完，由劉吳惠蘭（Rita）做局長嘅商務及經濟發展局，尋日宣布延長有關香港電台應如何履行公共廣播機構使命嘅公眾諮詢期一個月，直至下年一月四號，話要聽多啲意見喎，咁即係又拖啦！

政府搞咗場大龍鳳，話要做公共廣播服務檢討，拖咗三年幾份報告先出籠，點知政府變臉，一個唔該將份報告嘅建議掉晒落垃圾桶，跟住仲整咗呢份諮詢出嚟，其實早就為港台前途下咗定論，又話維持港台現有嘅運作模式，又話盡快畀佢哋興建新大樓，又話可以將合約員工轉番做公務員，遲啲仲可以請人添！

呢啲建議簡直係一大舊肥肉塞畀港台，政府都認為呢啲屬於港台內部運作，係港台圍內事，公眾爭議性唔多，於是同其他政策做三個月諮詢唔同，將諮詢期縮短為兩個月。

競爭法淫審例繼續拖

雖然港台員工仲係力爭港台要獨立於政府，但都唔係話唔收貨㗎，只係喺立法會畀啲議員嘈多幾嘈話諮詢期太短，Rita又縮番轉頭再拖。咁早知今日，又何必當初呢？依家咪畀外界覺得呢個政府真係弱勢到無倫囉。

其實，拖得就拖嘅情況早有前科，例如先前講嘅公共廣播服務檢討拖咗咁耐之外，喺Rita前上司馬時亨執掌呢個局時，已經話要做嘅競爭法，條草案拖咗幾年先話會排喺呢個立法年度下半年提交立法會審議，但到時唔知會唔會有變，可能又再拖；仲有就係被外界炮轟千瘡百孔嘅淫褻及不雅物品管制條例嘅諮詢，亦唔知要拖到幾時，再係咁拖落去，Rita隨時由孭飛變咗孭鑊。