當局成日話香港旅遊景點太少，影響旅遊業發展，其實係「不識廬山真面目，只緣身在此山中」，外國人當係寶，港府當係草。

諷刺嘅係，上述三個景點只有電影資料館係由政府管轄，其餘兩個如果唔係民間團體不斷努力爭取，可能一早已經唔存在。

例如新光戲院，幾十年來一直係主要粵劇表演場地，晚晚「查撐、篤撐」，不知幾熱鬧。但係近年來呢間碩果僅存嘅戲院受租約問題困擾，多次面臨結業危機，粵劇界人士頻頻撲撲爭取保留，政府一直闊佬懶理，直至最近呢次先至應承補貼租金，令戲院可以續約三年。不過業主已經講到明，三年後唔會續租。唔怪得時代網站叫遊客一定要喺二○一二年前睇睇呢個「即將消失嘅場地」。

李小龍故居嘅命運亦唔好得幾多。一代武打巨星李小龍係全球華人嘅驕傲，佢喺香港住過好長時間，亦喺香港成名，好多外地遊客都想參觀佢嘅故居，可惜間故居已做咗時鐘酒店。經過保育團體不斷爭取，政府先至同意將呢度改為李小龍紀念館，但唔知幾時先成事。

班高官近年成日話要保育中國傳統文化，但係講就天下無敵，做就有心無力。嗱，粵劇逐漸式微，政府口口聲聲要扶持，可惜搞到連最後一個大型表演場地都幾乎保唔住。好嘞，等到聯合國批准將粵劇列為世界文化遺產，班高官就出嚟認功勞，好似全靠佢哋粵劇先至唔會消失咁。之不過，正如有粵劇大老倌話齋：「政府對粵劇支持嘅方向好有問題，只屬救亡同濟貧性質。咁樣落去，呢個文化就會沒落。」

其實，講到傳統文化，又點止粵劇吖，例如有百二年歷史嘅大坑舞火龍，絕對係有本土特色嘅文化，好多外國遊客慕名而來，港府高官亦大讚活動有代表性，仲話要申請列為國家級非物質文化遺產添。不過，有人踢爆，其實三十幾年嚟，舞火龍嘅活動經費都係大坑坊眾福利會獨力承擔，當局未出過一毫子。叮。

睇嚟香港官員應該去內地好好學吓嘢，人哋搞文化遺產保育真係有兩手。遠嘅唔講，就講佛山嘅黃飛鴻紀念館，佔地超過五千平方米，有千幾件紀念品，人哋佛山當局講到做到，搞得似模似樣，依家已經客似雲來，點似得港府拖泥帶水，講多過做。

講嚟講去，港府高官信誓旦旦要保育傳統文化，無非都係大隻講，反而外國人比佢哋更加識得珍惜，你話係咪搞笑吖，叮！