小白觀點：延壽一個月咁大把

環境局使出十九招改善空氣質素，據說可以令懸浮粒子濃度降低一微克，到底對市民身體健康有乜大貢獻呢？Wow，真係唔講得笑咯，聽聞有數據顯示，我哋嘅平均壽命足足延長七百幾……個鐘！即係一個月咁大把呀！

做人嘅嘢食幾多着幾多整定，難得人生中多咗三十日，真係要好好享受吓呀。嗱，本來等到死都未排到嘅老人院舍，話唔定捱到終於有得入住，雖然住唔到幾多日，總算不枉交咗幾十年稅。仲有嗰二百五十蚊醫療券，用一年當然唔夠，但係一個月就冇多冇少僅僅夠用，所以呢，唔好再鬧當局孤寒成性，唔肯真金白銀派糖，家陣肯派多一個月命畀香港人，算唔話得啦。

網友觀點...X）...

[　十九廢招　]

簡單一句，無貢獻囉！

[　黑　佬　]

香港空氣質素真係差到無人有，每吸一啖都覺得吸緊廢氣咁，咩藍天行動，講就有份！

[　Ellen　]

將來可能個個要揹個空氣清新機出街，核突死咯！

[　1　9　]

香港仍然多車多廢氣，連望過去對面海都矇查查，眼見懸浮粒子吸晒入肺，十九招先降低一微克，同無做無咩分別。

網址：www.sunsiupak.blogspot.com

阿豪觀點：特區政府叻過上帝

環境局嘅空氣質素指標公眾諮詢就快結束，總共建議咗十九項改善空氣質素嘅招數，好似好大堆頭咁，但係畀醫學界批評標準定得太低。哦……唔怪得政府話就算做齊呢十九項，市民平均壽命都只能夠延長一個月咁大把啦！

諗深一層，一個月時間真係話長唔長話短唔短，上帝創造世界都係用咗六日之嘛，照咁計，特區政府咪叻過上帝五倍？不過其實大家都係唔使太認真，因為無論最終港人平均壽命有幾多，政府都可以大大聲咁話：「呢嗱，好彩我哋有推行十九環保招咋，如果唔係，你哋條命仲會短一個月㗎！呢條×-1個月方程式堪稱無敵，睇吓你哋刁民仲點駁嘴駁舌！

網友觀點...X）...

[　Johnson Lo　]

香港空氣咁污濁，就算多一個月命，都係吸多一個月廢氣啫……

[　賈卜勤　]

長一個月命？佢哋當咗自己係上帝呀？條數點計出嚟先？

[　傻　子　]

咩十九招？點解從來冇聽過，仲要諮詢完嗱？

[　what’s michael　]

所以咪話呢啲係十九環保招囉，明冇？

網址：www.lukchiho.blogspot.com