培正中學尋晚喺機場博覽館舉行創校一百二十周年嘅校慶晚宴，筵開二百七十一席，舊生及海外校友濟濟一堂，培正人中不乏公眾熟悉嘅面孔，包括科技大學創校校長吳家瑋、港鐵行政總裁周松崗、立法會議員何鍾泰、香港足球總會主席梁孔德、入境處處長白韞六等，藝人「柴九哥」黎耀祥都同培正有關，因為佢嘅囝囝係培正一分子。
新舊培正校友聚首，梗係唔少得回憶讀書時嘅百厭事，六十年代畢業嘅周松崗更唸口訣：「嶺南牛、真光豬、培正馬騮頭……」即係話培正學生好百厭，周松崗憶述，當年經常用粉筆塗滿書枱四條邊，等老師行過「揩」到一身都係粉筆粉，認真大整蠱；其次係用髮夾插入書枱木板之間罅隙，用力一彈即發出「登登」聲。
同樣係培正校友嘅政務司司長唐英年就話，以前返學要經過一條長長梯級，長年累月鍛煉腳骨力，近期回想當年走過呢條梯級，感受更深，覺得做事要一步一步、腳踏實地做。唐唐忽然有感而發，唔知係咪想暗示參選特首要逐步嚟呢？
一九六五年畢業嘅梁孔德就憶述，當年培正對面係墳場山頭，好多「校外活動」例如踢波同打架都喺呢個山頭進行，梁孔德自稱無試過打架同偷嘢，但就好鍾意踢波！