近排學界最矚目嘅一件事，就係中華基督教會基新中學狠斥警方破壞大家嘅協議，派女臥底嚟學校破案後又洩露校名，該校不滿警方手法之餘，亦表態希望教育局講句嘢，不過，教育局除由發言人回應事件外，局長孫明揚一連兩日都迴避事件，堅持封嘴走為上着。結果，大家嘅焦點都係集中喺警方身上，孫公高招，又一明證！
孫公前日出席工聯會職業發展服務中心開幕禮，活動期間佢嘅助手了解過大家想問乜，事後講明孫公唔會回應呢單嘢；隔咗一日，孫公又出席一個由教育局舉辦嘅新中學教學語言政策交流會後，大家再等佢回應，點知孫公例行公事後，又快速閃咗去。又係嘅，呢件事係警方搞出嚟嘅蘇州屎，孫公唔回應，就唔使蹚呢次渾水，高招就係「唔上身」。
但臥底之外嘅事孫公就講得好開心，好似尋日嘅「知識薈萃2009」英語與學科學習交流會咁，孫公致詞時不忘大講新中學教學語言政策，拋書包時好刻意咁用咗論語同德國詩人嘅詩，希望學生哥有追求真理嘅孜孜不倦精神，要佢哋「學而不思則罔，思而不學則殆」。