城中富豪二代知名度愈來愈高，早前佢哋聚首去鯉魚門食海鮮，當晚仲鬥晒靚酒添，因為當晚係香港菁英會主席施榮忻Jaime提前慶祝生日，一班兄弟開開心心出席，Jaime喺自己間老佛爺酒莊攞咗兩支紅酒，一支係五公升嘅一九五七年法國Chateau Gruaud-Larose紅酒，另一支係二○○三年Domaine du Grand Tinel Alexis Establet同兄弟分享，金利來集團行政總裁曾智明（Ricky）都唔執輸，喺屋企攞咗支九三年Dom Perignon法國香檳做賀禮。
今個月二十一日佢哋喺鯉魚門威龍海鮮酒家訂咗枱，出席嘅人包括莊士集團太子爺莊家彬（Albert）、立法會議員梁君彥公子梁宏正（Clarence）、燕之家創辦人白富鴻等，當晚嘅菜單有吉列黃皮老虎斑兩味，配酸甜汁及粟米汁，仲有椒鹽瀨尿蝦、貴妃蚌、螺片刺身等，當然仲有出晒名嘅「富哥炒飯」啦！
壽星仔當晚開嗰支Chateau Gruaud-Larose產自法國波爾多Saint Julien酒區，捧場者唔少，難怪當晚佢哋個個飲到好開心，食到舔舔脷啦。